السلام عليكم
هذي يا طويلين العمر والسلامه سالفتي يوم كان عمري 17 برا طبعاً <=== قبل لا ينولد عشان محد يقول انك كذاب
في يوم ئفقةئف (مثل ما تقولون يوم الربوع ألحين) <=== ما كان يتكلم عربي
في عام الفين وسته قبل الميلاد كنت انا والزير سالم ندخن ورى المدرسه وكان سوبرمان يراقب لنا ( سوبرمان كان دافور ومشبكينه حنا عشان ننقل منه الواجبات
ويغششنا ايام الاختبارات) الموهم الا فرعون مشطف بالفيل حقه قاعد يفر عند المدرسه ويشربك قالي الزير ذا كنه فرعون قلت للزير هاه تعزم نهرب الا يقول قدام
ونلقط سوبرمان ونشقح ونوقف فرعون ونركب معه شوي الا عنتر بن شداد يدق بيجر على الزير (ماكنا نمون على عنتر) الا يقول لعنتر الحقوا فيه تفحيط بايطاليا ونتحمس
ونعبي بنزين وندز ونوصل لايطاليا بربع ساعه (كنا بالمريخ) وهاتك يا تفحيط وهاتك يا رجه الافيه ورع مسوي يفحط مع وجهه على فرس وأوقفه انا والزير ونجلده وناخذ فرسه
واستلم الطاره والزير كان معزز وتفحيط ورجه الا نشوف الدوريات راكبين دينصورات وجايينا يمشون ست آالاف الموهم وأدعس شوي الا سوبر مان لاحقنا وشالنا
وطاير بنا للمريخ كان شالنا بيد واليد الثانيه الفيل ومعه عنتر وفرعون ونوصل للمريخ ويرجع كل واحد بيتهم بعد يوم كان حافل بالجريات والمدرسه مكلمين البيت وكل واحد
دبر له تصريفه
فرعون كان مفصول ويشتغل بمحطه يعبي بنزين
سوبر مان أنجلد لين عظ الارض لان أبوه طلع مصري
الزير لعب على ابوه قال انه
شاف جساس وطلع يلحقه بس ان انحاش
عنتر بن شداد (الخال) قال لابوه كانت عندي عرس خخخخخخخخخخ وطلعت
أما انا جحدت كالعاده
سالني ابوي عن
الفرس قلت فزت فيه بسحب بالمدرسه وبعد ما خلص ابوي محاضره كالعاده سحبت امها نومه ما قمت الا على صوت ابوي (طول الله عمره) كان رابطني
بحوض الفيقرا ويسحبني للمسجد عشان اصلي الفجر معه واصلي وارجع البيت واقهويه لبن واصب له فميتو بعد ما خلص من اللبن
الا يقول يالله اخذ فرسك اللي فزت فيه والحقني للابل <=== الشي الوحيد اللي ما تغير للحين
والله وادق سلف واشغل الاي بود والمكيف واحرك وما صفط الا صافط(ن) معه .. الا الراعي مربوط بطنب الخيمه ويبكي يقول القوم جوه واخذو الابل وربطوه
وحطو رجيلهم واخذ جوال ابوي وادق بيجر على الزير ويمر العيال وشوي الاهم محضرين وهم فرعون وسوبرمان والزير سالم وعنير بن شداد
فرعون كان معه فيل وسوبرمان كان يطير ما يحتاج موتر والزير وعنتر كان كل واحد معه حصان (الحصان كان مثل الددسن اللحين) ونحرك ونلحق القوم وكانوا
1000 فارس من المخلوقات الفضائيه (لا تسألوني وش يبون بالابل) ونلتقي بهم واحتمى الوطيس ويقتل سوبرمان في اليوم الاول وفي اليوم الثالث قتل
فيل فرعون فسقط فرعون من الفيل ومات وفي اليوم الخامس قتل الصديقان الحميمان الزير سالم وعنتر بن شداد
والمعركه الى الحين حاميه قتل منهم
خمس ميه وباقي خمس ميه وان ما رجعت والابل ما هيب معي راح يسحب مني ابوي الفرس الموهم صار لي اسبوع وانا ما كليت ولا شربت ما فيه الا قوت
ذبح بالمخلوقات الفضائيه وبينما انا اذبح واكر وافر الا بنزين الفرس خلص وما حولي محطه واتذكر ان الفرسي حامل واصفط على جمب
واشق بطنها واطلع المهر وارضعه شوي لين كبر وامتطيه وادعس واذبحهم كل ابوهم وأخذ الابل وارجعها لابوي
طبعًا انا انقهرت يوم ذبحوا اخوياي وحلفت لارجع وأمحيهم من على مجرة درب التبانه لكن للحين ما أنولدت
اول ما أنولد راح اخذ الثار حق الشنبات اللي ماتوا معي
ملاحظات:
1- ترى محد كان مسلم الا انا
2- تراني ما أحبهم
3- ترى القصه واقعيه وأشترت مني هوليود القصه بمليونين بس الى الحين ما استلمت المبلغ لاني ما بعد انولد للحين
4- سامحونا على الإطاله
5- مع السلامه
29-07-2006, 11:40 AM
ههههههه سالفه على كيف كيفكم
