اكتشافاتي العلميه والعمليه فوق الشمس

[The Red Eyes]

السلام عليكم ورحمة الله وبركاته
مساء الخير للجميع اذا كنتم مساءً وصباح الخير اذا كنتم صباحا


انا في سطور
/ دكتوراه في الهياط الجيوفلكي
حاصل على الدبلوم البكش عن بعد
استاذ مشارك وشبه متفرغ في جامعه اخرطوا سيتي في مقاطعه هلس
خبير مفرقعات ناريه تخصص صواريخ
ليصنص من كلية العلوم
بحث علمي عن سلوك الارانب وتكاثرها
عضو في جمعية بكاشين بلاحدود
عضو نقابه النصابين الدوليه
حاليا / رائد فضائي وباحث فلكي اتم بنجاح رحلة فضائي للشمس تمكن من الهبوط على سطحها بنجاح


بداية احب ان اتحدث لكم عن رحلتي .....قمت برحلة فضائيه على متن المكوك الفضائي هلسنزر اللي اغلب العالم شاهدوه وهو يحط على سطح الشمس وكان الغرض من الرحلة قياس المسافة بين الشمس والأرض بالمليمتر وهل فعلا إسحاق نيوتن صادق يوم يقول أن فيه جاذبيه ولا لا وأيضا التحقق من إثباتات ماجلان هل فعلا الكرة الارضيه دويره ولا بعد يكذب علينا هو وجهه المهم مالكم بكثر الهرج طرت بالرحلة هذى وكان معي وقتها أربع أشخاص الأول روسي والثاني أمريكي والثالث بريطاني والرابع بولندي والخامس فرنسي والسادس ياباني انتم طبعا تشوفون الجنسيات مختلفة( ابوك يالتصريفه جنسيات مختلفه هاه كم قلت عددهم؟؟؟) واللغات بعد تختلف خلال الرحله
الأمريكي والبريطاني كانوا يتكلمون مع بعض وتاركين الياباني لحاله ومسوين حزب عليه وسمعت واحد يقول للثاني تذكر يوم هجدناهم بالحرب العالمية الثانية يسّمع الياباني وأنا يا أخوان اخذتني العزة بالإثم وقمت وبقست الأمريكي بوقس على وجهه وقلته هاه أحر البوقس هذا وألا قنبلة هيرو شيما إن ماعقلت بشوتك مع دريشة المكوك حنا جايبين مبزره معنا الظاهر أعقل أنت وياه ولا بنزلكم هنا وقتها حنا بين عطارد والزهرة المهم صاروا يتمتمون بالانجليزي وإنا يا إخوان من الناس اللي يعتز بلغته العربية وحلفت بيني وبين نفسي لو يطقون مااتكلم معهم بلغتهم حتى لو يقولون ما يعرف انجليزي المهم يوم بقى على الشمس حوالي سته كيلوا مترمكعب قلت لطاقم الرحلة اللي معي كل واحد منكم ياخذ له ملعقة فيفادول كلهم ا شرربوا فيفادول وقت ما شربوا فيفادول كأني شميت ريحة بنزين مو ريحة فيفادول ناظرت بالمرايه الجانبيه حقت المكوك لقيت خزان البنزين ينقط قلت للامريكي والبريطاني اطلعوا برى شوفوا وش سالفة البنزين ابي افتك منهم المهم طلعوا يشوفون وش المشكلة رجعوا ما هم دارين وين ربي حاطهم قلت ألشرهه ماهي عليكم ناديت الياباني لأني أثق فيه قلت استلم الطاره أبروح أشوف المشكلة وأجي طلعت برى بشجاعتي المعهودة ولقيت الخرطوش اللي هو الّلي حق شيشة البنزين موجود يسحب ورانا اتصلت على الفور بالقاعدة الأرضية وقلت وش السالفة قالوا لي أنت الله يهديك انطلقت قبل سبعين دقيقة من الوقت المحدد وش فيك جعل الله يهديك والرجال الفني المسئول عن تعبئة المكوك ما انتهى من شغله والقفازات حقت يديه وحده عنده ووحده عندكم قلت يالله الخيرة المهم واصلنا رحلتنا وكثرة علينا المذنبات ومساحات القزازحقت المكوك صارت ما تمسح من كثرهن اعوذ بالله قلت بقلبي خلني امسك البولندي أو الفرنسي اللي ساكتين من يوم رحنا وامسح بفرة واحد منهم القزازمسحت بفرة البولندي القزاز مع إن الفرنسي اقرب بس تذكرت زين الدين زيدان وخليته والبولندي مثل قلته كملت الرحلة خففت سرعه المكوك واستعديت للهبوط على سطح الشمس مادريت الا البريطاني والأمريكي يوم جو بجنبي وإنا أسوق ما جاء في بالي أنهم يبون يعنني حنا اللي سقنا غير يوم تذكرت بالأخير فكرت بخطه قلت خلني اهبط بقوه عشان يتناقزون عني وفعلا هبطت بقوه وتناقزوا ونزلت انا أول واحد عشان البث المباشر ينقلونه على التلفزيون ويشوفوني أول واحد نزل والمفاجأة الكبرى تدرون وشي عيال الذين لابسين لبس ولا علموني اللبس هذا اللي يلبسه يطلع بالتلفزيون واللي ما يلبسه ما يطلع عشان كذا ما طلعت عااااااااش مصرف سحبت البولندي الافدغ واخذت لبسه وش الحظ
ما أمداني البس اللبس الا الشمس غابت علينا واظلم علينا الليل من بكره أصبحنا وطلعت الشمس والخواجات طلعوا قولف يبون يلعبون ناديت الياباني وقلت تعال العب معي وطلعت من جيبي مصاقيل عطيته مصقالين وآنا معي مصقال مائي كبوري وصرنا نلعب انا قلت أخير ي ولعب هو ولعبت انا صار يحذف مصقاله واحذف مصاقلي لين ابعدنا المسكين الياباني ذبحه الحر وبغي يموت بس انا عادي متعود التفت لين المكوك بعيد عنا قلت ياولد الحق الحق خفت ينحاشون ويخلونا تعال ارجع عاااااااااااااااد تذكرت إن مفاتيح المكوك معي
طلعنا أجهزتنا وسوينا أبحاثنا خصوصا آنا واكتشفت إن الشمس بها هيدروجين وقست سرعه الضوء وبالسنتمتر لقيته ياصل الارض بثمان دقايق دربلت بدربيلي على الارض واطلقت عليها الكوكب الازرق لاني شفت لونها ازرق من بعيد وشفت برج المملكه والفيصلية وكأاني شفت برج المملكه اطول شوي شفت بريق عجيب يصدر من الارض اكتشفت انها صلعه الحكم الدولي عمر مهنا واشك انه كان لها اثر فلكي سلبي في السابق على منازل القمر خصوصا عندما يبدوهلالاَ عديت الكواكب لقيتها تسعه وفيها واحد يالله وبالله تشوفه اسمه بلوتو و فيه زحل شكله رهيب وحلو مره وصرنا نشوف كل شي حتى خريطة المانيا واضحه وشفنا مباريات كاس العالم من دون تلفزيون واشتراكات ودوخة راس وانا يوم قمت برحلتي شايل هم مباريات كاس العالم كيف اشوفها
وشفت زيدان يوم اخذ كرت احمر وانا على سطح الشمس وتصدقون مبارة السعودية مع أوكرانيا ماقدرت اشوفها زين كانت عندنا بالشمس غبار وانفجارت شمسيه سببت تدنى مدى
الرؤية الافقية



بعد رحلتى الموفقه هذه اكتشفت عديد من الاكتشافات و النظريات اهمها
1- اكتشاف عنصر جديد اطلقت عليه اسم عنصر الهلسيوم
2- اكتشفت النظرية النصبية
3- صححت قانون الجاذبيةالارضية واكتشفت ان سبب جاذبية الارض هو وضعها للروج الازرق و وقوف كوكب زحل الرائع والوسيم في احد المدارات بأنتظار الارض لارسال ذبذبات واشارات بلوتوثية وهذا هو سبب جاذبية الارض وتميلحها اللي ماله داعي وللمعلومية زحل هذا اللي شكله دائري وعليه حلقه كأنه لابس كاب


وانشالله مزيدا من الابحاث والتقدم