كنت نايم في غرفتي ومن شدة التعب نمت على الأرض جنب السرير ما كان فيني حتى حيل أرقى سريري (<<< منتب عاقل ملك النمسا على هالسرير.. تراه مهناا بعد عن سرير حارس عمارة).. اللي يشوفني وأنا متكوم ونايم يحسبني كيس زبالة مليان بعد عزيمة ومرمي عند الباب... وأنا ما يصير شكلي كذا ألا إذا صرت تعبان مرة لدرجة أتمنى أني أموت شوي وبعدين أقوم (يا كثر اللي يقولون الله يحقق أمنيتك هذي)... دخل النوم عيني الكحيلة قرابة الساعة 7 الصبح وما أمداني أبدأ احتلم قصدي أحلم ألا وباب غرفتي ينفتح ويدخل أبوي...
يلعن أصلك لهالحين نايم؟؟
وأبوي وهو معصب شكله يشبه الديناصورات في الأفلام القديمة اللي تجي أسود وأبيض ...
طبعاً سفهته الله يغفر لي، مالي خلق أكيد يبيني أوديه كالعادة لسوق الزل يسوم المقمّع حقته هللي أشغلناا بهاا.
قم يالهيس الأربد يا سفاب سهرتي مع أمك ذيك الليلة ليتني نثرتك على السرير...
منتب عاقل تمن علي بهالنسب يا سليل أباطرة روما... (هي أسمهاا خربت!!).
وجا أبوي ورقى فوق السرير ويطمر وينزل كوع علي بحركة كذا مخلبية!!.. وجا كوعه في جنبي ومن قوة الضربة تفلت كلوتي... وصرت أتألم بطريقة حزينة، فاتح أثمي ومغمّض عيوني وودي أصيح بس ما أقدر منقطع نفسي .... أبوي استانس وحس أنه قوي وأن الشيب اللي فيه حاجة يعني كذا وراثية مالهاا دخل في كبر السن.... وجو أخواني ودخلوا الغرفة وقامو يشجعون أبوي... وجابت أمي جرس ومطرقة صغيرة ودقت الجرس يعني جولة جديدة من المصارعة الحرة وقامت تصارخ: أيه مزدي فيه!! أجل أمس أقوله جب صامولي ولبن ويسفهني!!... أبوي تفلّت علي مدري وش جاه ويشيل الكرسي ويضربه في راسي وحسيت أن الدنياا أسودت شوي في عيني (لاحظو تراي ما بعد أفطرت <<< يعني ظنك هذا السبب؟؟)... أنا قاومت وأرفع يدي وأحطهاا على الجدار يعني ما تحسب هزيمة..
وابدأ أقول لأبوي: شف يبه مالهاا داعي هالحركات أنت تدري أني ما أقدر أمد يدي عليك...
وشو يلعن خيّرك وتهددني قدام عيالي (ليه وأنا وشو؟؟)..
لجأ أبوي للسلاح الأخير راح شال التلفزيون 34 بوصة وهو شايله يديه وسيقانه ترتعش من شدة الثقل حتى عيونه أحولت (المخ فقد التركيز ولعد عرف كيف يوجه الجسم!!) ثم من شدة الحول أفتر سواد عيونه لوراء و صارت بيضاء كلهاا.. ويقرب ويقرب ويرمي التلفزيون علي... من قوة الضربة طلع مني صوت زي صوت الشري لامنك فغصته برجلك في البر...
ئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ ئئئئئئئئئئئئـ هـ << هذا اللي قدرت أقوله من الوجع
والله يا هو ثقيل هالتلفزيون وأنا منوّل أحسبه فاضي من جوا... بعد هالضربة طار مني النوم (بدري)... وتجي أمي ترفع يد أبوي يعني هو الفايز ...
بدل ملابسك هذي يالمروح وحطهاا ورى باب المطبخ عشان تستخدمها أمك خرقة... وألبس أي شي ماله ريحة، عيال الجيران يطلّون من فوق الجدار على حوشناا يحسبون فيه خروف ميت عندناا ومخور.. يالله بنروح لسوق الخضار عندناا عشاء الليلة..
ما شاء الله ولا عزمتني ؟!.. (يقالي أمزح و ألطف الجو مع الوالد)
وراح للتلفزيون بيشيله مرة ثانية بس أناا هجيت وطلعت من الغرفة!!...
لبست التكميلة الرياضية حقتي... والتكميلة حقتي من تكاميل وزارة المعارف اللي كانوا يوزعونها بلاش منوّل... وللين ما يعرفونها أقول لهم... هي عبارة عن تكاميل مهما لبست منها أي مقاس راح تصير محزحزة ومخصّرة عليك (يا سفابهاا على جسمي مهناا إغراء!! و يصير جسمي كنه خيشة مليانة رمل ما فيه تناسق وأنواع الزوائد اللي مدري وش تبي!!)... وهالتكاميل يجي في جنبها خطين بيض متوازيات تمتد من الرقبة إلى العرقوب. وهي يجي منها ثلاث ألوان بس. أخضر وأسود وأحمر. الأخضر للين يلعبون... والأسود للحكم.. والحمرا للأحتياط.. أنا طبعاً بدلتي حمرا لأني كنت دايمن احتياط وأجيب الكورة إذا طلعت من الملعب (< مخفة الفصل).
وحناا في الطريق لعتيقة بدأ أبوي يسوق بدالي كالعادة لكن بدون ما يمسك الطارة... أنتبه للتريلا يالأعمى ... أنتبه لا ترقى الرصيف ... لحوووول وشفيك مسرع
رحناا لسوق عتيقة وبديناا حملتناا المقدسة للتقضي... وهالصعايدة ينادوني.. ياوااااد يا جيميل تعال هينيه شوف البرتقاال .. إذا ألتفت عليهم وشافوا وجهي يصرفونهاا يقعدون يصففون كراتينهم من جديد ...
خلصنا خرابيطنا من سوق الخضار وشرينا فواكة أول مرة أشوفها، بالعادة أشوفها على علب العصير واحسبها حركة دعائية وأنه مافيه أشياء مخلوقة زي كذا... طلعت من السوق ويديني وأثمي رابصه ومدبقه ما بقي شي ما ذقت منه من زود الفجعه...
اتجهنا أنا وأبوي لسوق الغنم وأنا في الطريق ما دريت ألا وراس أبوي في حجري قلت: قم عيب ماله داعي وبعدين أنا أسوق ماأقدر << الوصخ راح تفكيره بعيد... صار المسكين داخ مدري وش جاه الظاهر السكر والشمس وكثرة المشي جابت أجله وأنا أسوق قاعد أدفدف راسه وأهزه بدون ما أطالع لأن عيني على الطريق والظاهر أني تحمست شوي ولا عاد صرت أحس به ... وأطالع تحت لقيته متكوم عند دعاسات البنزين وأسفط جنب وأعدله وأرجع البيت نزلته وقلت لأمي تراي سامعن أبو سعد يمدح مشية أبوي يقول: راكده مشيته كأنه يرقى درج (وأبو سعد هذا جارنا شايب قذر ونظول من النوع الي إذا طلعو أهلي من البيت بيركبون السيارة معي يقاعد يطالع ألين يركبون كلهم تقل ياخذ التعداد << حركة سوقية تنم عن قلة ذوق << أحلى أنت يا ناقد اجتماعي رصين)..
رحت لسوق الغنم وأسفط عند أول طعس ومن دون ماأنزل من السيارة فتحت الدريشة وقلت له: بالله واحد خروف << طالب شاورما الظاهر... هو شافني وشاف تكميلتي وملامحي الي تدل أني فيني تخلف عقلي قال بس هذا الصيدة ورمى الخروف في الصحن وعطيته 500 ريال وفحطت ومشيت بسرعة والله لوه مركب بربري أعمى و مدوّد و ليته مشطوفه والله أن ماأدري...
وأنا راجع مسرع وموحف بقوة وقاعد أهيجن بزعمي أقضي الوقت فيما ينفع
يالله على بابك نستخييييييييير *** نرجي من عظيم جودك كثييييييييييييير
وأسمع صوت: يا حمار هد لا تسرع ماورانا شي..
وأدقق في الصوت كأنه صوت أبوي وتذكرت أنه في البيت بس شلون وصلني صوته؟؟؟ وحسيت بإلهام كأني سمبا يوم شاف أبوه في الغيمه وهو يقوله: تذكر تذكر... وأنا أبوي يطلع في الغيمه يقول: سدد ديوني سدد ديوني القبر ضيق وكل ماله يضغطني أكثر بسرعة سدد...
بس الصوت مهوب صوت أبوي وقلت أكيد هذي أوهام تجي للي في مثل سني < تصريفه مدري وش تبي
وصلت البيت وأنزل الخروف (أبشركم صار نعيمي وعيونه ناعسه ) وأمعطه مع صوف رقبته أجره كأني جندي أمريكي يجر عراقي بريء < ويقولون عنا شباب داشر مايفهم في السياسة ولا يتابع الأخبار والمؤامرات ضد الأمة!!...
وأرميه ورى البيت وأحجر له بخشب طاولة تنس كانت عندنا (وكل سنة نشتري وحده نلعب بها أسبوع وبعدين نحجر بها الغنم في الحوش!!)... ومع الجهة الثانية كومت سياكل على سلم على خرابيط المهم سويت جدار عازل زي حق إسرائيل <<< متابع يقظ للسياسة ...
وأدخل وآكل هريس مسويته أمي الله يجزاها بالجنة، من شدة جوعي لما خلصت الصحن جبت مفروديه وقمت آكل الي بقي و أغط عليه... وأطلع للسيب وأنا أمشي ومعي كاس كرافت مليان شاهي أبو جبل عاقد وثقيل ويطلع بخار زي سيجار هافانا الفاخر وأمشي بشوييش وثوبي مشقوق المخبات الي فوق المعنى أن شكلي خطير خصوصاً الصلعة معطيتني هيبة مهيب طبيعية ...
وأنتم تعرفون هالشعور لما الواحد يشبع وتمتلي كرشته ويقعد يشرب شاهي يحس بسعادة و روقااااااان... وأروح للخروف وأنا متكي على خشبة التنس وأطالعه وأقعد أذب عليه من زود الروقان
أول مرة أشوف ليه تجتر أوووه هذا وجهك معليش ماانتبهت خخخخ <<< قاعد أتميصل عليه
ألتفت الخروف يطالعني وماعاد يجتر،، أنا أستغربت وش هالتوافق الغريب أنه يلتفت لما تكلمت عليه، قلت أكيد صدفه،، وأكمل مصالتي: شكل أبوك يوم شاف وجهك لما أنولدت قال ليتني ماخذ عنز أصرف من أمك هعهعهعهاهاهاهاهه
وأضحك بقوة وقام الشاهي يتكبكب مني << صار حشيش مهوب شاهي على هالروقان
بالله إذا بغيت تعد للعشرة ما تتورط ؟؟ ما عندك الا ثمان حوافر هههههههههههههههههه
أحمد ربك انك منت مطوع والله أن تبلش إذا بغيت تسبح وتهلل بعد كل صلاة بتقعد ثلاث ساعات ههههههههههههه
مسكت خط في مصالتي معه، ثم صار شي غريب، ألتفت لمي وفجأة وبدون سابق إنذار << مستهلكه هالعبارة من جد... تكلم الخروف وقال:
هالحين أنت متزاين وجهك ؟؟؟ وأنت تتكلم كنت أحسبك معطيني ظهرك، أول مرة أشوف نفر في صلعة، من كبر النفرة توقع عليها ثلاث ذبانات، إذا لبستا طاقيه شخال يطلع النفر من الفتحات، أول ما شفت صلعتك والنفر حسبت راسك ديد وهذي حلماته زي ضرع البقرة ...
أنا أنصدمت وحسيت بدوخه وحطيت يدي على راسي << حركات المصاريا في المسلسلات لما الأبو يكتشف أن بنته عامله حاقه وحشه
ويجي الخروف ويطمر من فوق الحاجز ويعطيني هذيك العسّه (نطحه) في وجهي رجعت ثلاثه متر ولا وقفني ألا الجدار خبطت فيه وطحت وأنا مادن رجليني وظهري متسند على الجدار... وأشوف الخروف جاي مسرع وهو منزل راسه حول ما يلمس الأرض (يعني ماخذ عزم ولد اللذينا) ويهفني بوحده في وجهي طلع صوت طقطقه في وجهي زي صوت الكوع إذا طقطق... أجل العنز أحلى من أمي هاه؟؟؟ << المسكين جرحته هالكلمة
ويرجع ويعطيني ثانية من قوتها قرنه نشب بين ضروسي ويسحبه بقوة ويطيح ضرس أسود كبير << ضرس العقل صار مسوس...
يقولون الثالثة ثابته،، ويرجع بقوة للحاجز ويتسند عليه ياخذ عزم زي حقين المصارعه ويجي مسرع بقوة، أنا كنت نصف دايخ نصف واعي وكنت أشوفه ثلاثه ومحتار أي واحد منهم الصدقي عشان أبعد عنه، قلت خير الأمور الوسط بأبعد عن الي في النص، ولما قرب مره وخرت بحركة سريعة زي الماتركس ويخبط خبطه في الجدار من قوتها سمعت شهقة جارتنا العجوز <<< كانت فارشه في الحوش تتقهوى وهي متسنده على السور الي بين بيتنا وبيتهم، سمعت بعدين أنه أنكسر فيها ضلعين
طبعاً الخروف لما خبط تناثرت قرونه وصارت رمل وطاح وهو مغمض ونصف لسانه طالع وعاضه < يعني إغمائه قويه... وأجي من بعيد أنغزه بعصى مكنسه أتأكد أنه مهوب مسوي كمين...
دخلت بسرعة جوا البيت وقلت يمه وين قدر أبو ذبيحة حقنا؟؟.. بسرعة هاتوه وهاتو العين وينها. أمي استغربت: هوو والطباخ الي مكلمه أبوك؟. وأجيب عدة السلخ والذبح وأسحب الخروف مع آذانه وأنا أسحبه فيه خط مويه من السحب بسبب لسانه الي طالع برا. وأجيب السكين وعلطول أذكيه بدون ما أسمي ولا وجهته للقبله أبي أموته وأرتاح...
وطلعت أمي ومعها العده وشفتها وأسلم عليها: كل عام وانتي بخير عيدك مبارك ماما وعساك من عواده << خش جو أنه عيد الأضحى
أدهرنا في الشغل ولا وعيت ألا وراس الخروف يمشي لحاله جاي لمي اول ما شفته اخذت راسه وحطيته بقدر
.. سولفوا المعازيم في ألف سالفة وكلها فقش طبعاً وكل واحد هو الرهيب الي يعرف كلش وهو الي عنده مصادر... من يوم تشوف الواحد يقول: جاك العلم؛ أدر أن ما في راسه...
قلطناهم على العشا وأنا أفشل أبوي أقول: أقلطو على كثر الكلافة من الصبح وأنا أهجول وأبترم قسم بالله نواشف تخب عليكم الله يكرم النعمة وأبوي يدعس رجلي وهو عاض براطمه ويقولهم: لا تواخذونه عيال هالوقت الله يصلحهم أو ياخذهم والثانية أولى...
طبعاً الله لا يوريكم الضيوف ما عرفوا ياكلون، راس الخروف صار يتكلم وما بقي شي شين ألا وقاله: تراني بـ100 ريال كبدي مريضه والطحال منتفخ وأبو مضطهد مستخسر عليكم حتى البربري.
و رجليه تتحرك، والخروف شكله فيه عرق مصري قاعد يرقّص الليه على الباديه، محد عرف ياكل وكلن سمى مرتين، مرة عشان ياكل والثانية من هلي يشوفه، وقاموا ومحد أكل وهجوا من البيت وقعدت هالنعم محد لمسها...
أبوي حجرني في زاوية المقلط وخذ تلزيخ: أردى منك الي يتكل عليك يالهطفه تعال نضف اللحم ونعطيه مبرّه خل الخروف يضيع في بطون التشاديه...
ودينا اللحم للمبرّه وافتكينا من هالخروف الي مدري وش سنعه، وأبوي يقول: الدجاج أضمن و أرخص
وبس . المجنون اللي يتوقع فيه فوائد.
29-07-2006, 09:49 PM
انا والخرووووف
