معقوله الي صار لي ؟
<<< ايووووه بدا النصب
على ما اذكر في عام 1940 م اعلنوا عن قيام الحرب العالمية الثانية (طبعا بين المانيا ودول التحالف).. وانا بصراحه ايامها كنت احب فنون القتال والمصارعه .. واحب اتابع طاش ما طاش.. يعني هذي تقريبا اهتماماتي هذاك الوقت ..
كنت عايش في قرية ام العناقيز ,, وسبب التسميه كان يسكن فيها وحده على خشمها نفره ..
وفتحوا باب التطوع للي يبي يشارك في هالحرب .. وبكل فخر انا السعودي الوحيد الي شارك .. لان وقتها الناس كانت مشغوله بستار اكاديمي ..
طبعا رحت لوزارة التربية والتعليم هذاك الوقت وقلت انا اسمي المنفلت بن فلته وابي اتطوع لهالحرب .. ناظرني الموظف باستغراب وقال لي وش شهادتك ؟
قلت : دبلوم شبكات
قال اوكي تعرف تسوي كذا >>>>>> قعد يسوي حركة الريوس حقت مايكل ويشكشك على ورا ..
قلت : ايه
قال خلاص اعتمد .. وجهز نفسك هذي بدلتك العسكرية وحاول تدبر لك ساكتون .. ويوم السبت الجاي موعد الاقلاع .. البعارين جاهزه عشان ياخذونك لمرسيليا ساحة المعركة .
والله واروح وانا طايرن من الفرحة من قدي اول عربي سعودي مسلم يشارك في الحرب العالمية الثانية .. وش هالقوة
************************************************** **********
يوم السبت 11/7/ 1940 م
ركبت البعير ومعي طاقم يوصلوني لفرنسا ويرجعون بالنياق ..
ابد سبوعين وانا في مرسيليا.. بصراحه شي ماينوصف .. دخنة القنابل مغطية المدينة والجنود اسمع صراخهم .. واسعافات رايحه جايه ..وانا جالس اتأمل شطفني صاروخ بس الحمدلله حكني شوي بس
جاني جندي من التحالف قال لي من انت ومن اي دوله .. قلت انا الجندي رايان اوه << متأثر .. قصدي انا الجندي المنفلت من السعودية .. ابتسم الفرنسي وقال وش اخبار شارع التحلية سمعت انكم تبيعون قهوة فرنسية هناك.. << والله اخبره قال كذا ان تسان مانيب واهم .. بس على مايبدو انه ماعرف وش السعودية ..
قال اتبعني انا رئيسك .. والله وادرعم وراه .. لما وصلنا مخبأ واتوزى فيه وامسك ساكتوني ..الفرنسي شاف الساكتون حقي وينبطح ضحك .. التفت عليه وقلت خير ؟ لا يكون ذا تمثيل مهيب الحرب؟
قال من جدك تحارب الالمان بساكتون .. جاي تصيد عصافير؟
خذ هالرشاش
والله وامسك الرشاش وماااش قمت اتراجف ماعرف له .. واجرب اضغط الزناد .. وشوي قام يخضني الرشاش ويفتر وذبحت خويي الفرنسي .. وامشي على الكتيبه اللي معي كلهم افتر هالرشاش لين قتلتهم ..
اشوف الالمان في الجهه الثانية يطالعوني ويصفقون .. ويناديني واحد منهم وادرعم له ... قال انت شجاع وبطل
اول مره في تاريخ الحرب كتيبه كامله يقضي عليها جندي واحد بس !
اسمع تعال معنا .. رحت معهم وغيرت ملابسي لبست طقم المانيا ...<< تحمس مع المونديال ..
الحرب استمرت اربع شهور
اخر شي قال لي ضابط الماني .. ترا هتلر سمع عن قصة الكتيبه وطالبن انه يقابلك ..
بصراحه ماصدقت معقوووووله انا المنفلت اقابل هتلر شخصيا .
خذوني للقصر الرئاسي وهناك جلست بمجلس كبير احتري هتلر .. شوي قام المجلس ومــددو يديهم فوق ( حركة هتلر)
انا من اللخمه مديت يدي الثنتين
المهم تكا جمبي هتلر قال وين تدربت فيه ؟ قلت ابد تدربت فوق صطح بيتنا اصيد عصافير .. واحيانن اروح ويا ولد جيراننا دحيم نجربع ..وعلى هالحال
قال انت بطل .. وعشان كذا بهديك وسام الشجاعه من الدرجه العاشره
والله ويكبر راسي .. عاد يوم جا يلبسني الوسام نزلت راسي ويحت شوي قمل على يده .. قال وش ذا ؟
قلت ابد هذي عندنا حشرات يسمونها قمل ومايحلى لها الوضع الا في الشعر .. وطال عمرك انا متاكد لو انفض شنبك بيطيح قملتين ومعهن سلاح
قاام يضحك وانبسط مني
وابد ومرت الايام وصرنا اصدقا انا وهتلر دايم يدق علي وادق عليه
اخر مره قابلته في ماليزيا رايح انا والاهل وشفته هناك ... ميين هتلر؟ انا اقول له .... ابتسم وقال من المنفلت؟ الله يقلع شكلك .. للحين حي انت؟
قلت ابد طال عمرك عايشين بهالدنيا ونراكض ورا الاسهم
هلتر: والله انا جاي انا وثنين من خوياي نبي نشوف لنا كم مصنع نووي .. تعرف امريكا مشغلتن هالعالم والظاهر انهم بيخلوني ارجع لحركاتي اول
ضحكت انا ووقلت ياهتلر انتبه بس لا يحجرون لك مثل صدام ..
خلك مثلي موسعن صدري في هالطبيعه
وبعدها افترقنا
الله ياخذ عدوكم رجعتوني لشريط الذكريات <<< وش عنده
ومرت السنين
وهتلر ماات
والمنفلت ترك الخدمه العسكريه ويعمل في احد فروع بنده
30-07-2006, 10:35 AM
يوم كنت بالحرب العالميه الثانيه
